Koncert prijatelja i kolega Massima Savića pod nazivom “Za Massima – Mali krug velikih ljudi”, a na ideju njegove supruge Eni Kondić biće održan 14. novembra u zagrebačkoj Laubi, kući za ljude i umjetnost.
Nina Badrić, Neno Belan, Matija Cvek, Sergej Ćetković, Ivan Dečak, Dino Jelusić, “Meritas” i Vanna na ovom svojevresnom muzičkom spektaklu otpjevaće hitove koje je Massimo pjevao na svom najvećem, ali nažalost i posljednjem koncertu u zagrebačkoj Areni prošle godine.
Kako se navodi u saopštenju “Aquarius Recordsa”, čitav koncept, izvođače i ekipu koja stoji iza projekta odabrala je Massimova supruga koja ovim koncertom želi dati posvetu velikom muzičaru, njegovom radu, umjetnosti i prije svega zahvaliti njegovoj publici koja ga je toliko voljela i poštovala.
“Kažu da se sve u životu događa s razlogom. Puno je signala dok koračamo kroz život, ali ih ne vidimo na vrijeme, prepoznajemo ih tek kada se sve dogodi i prođe. 5. studeni 2022. godine maestralan, ali nažalost, posljednji Massimov koncert u Areni Zagreb. 14. studeni 2023. godine, Lauba, ‘Mali krug velikih ljudi’, koncert ‘Za Massima’. Eto i sam mjesec ima zorno ime. Studeni. Upravo radi te studeni koja me zatočila, opet simbolično, na Massimov rođendan, rodila se ideja napraviti koncert Massimovih pjesama. Razlog da bude tu, kroz svoju glazbu, kroz svoje prijatelje i kolege. Kroz svoju publiku”, riječi su Eni Kondić.
Na koncertu će nastupiti bend Massima Savića u sastavu – Ivan Pešut, Marko Matošević, Gojko Tomljanović, Boris Popov, Alen Svetopetrić, te Bruno Urlić, a uz njih svoj će doprinos dati i Massimovi prijatelji i kolege Ivo Popeskić, Bruno Kovačić, Igor Geržina i Predrag Peggy Martinjak.
Za svakog od osam vokalista Eni Kondić je pomno odabrala pjesme koje će izvesti i svima je bila čast preuzeti odgovornost da ponovno udahnu život Massimovim pjesmama.
BONUS VIDEO:
